الاثنين، 25 فبراير 2013

إياب الأبطال، تصريح إلهامي وطريقة كسر التكتل!



تقريبًا بما إن موضوع الدوري منتهين منه، الضغط كله الآن على إياب كأس الملك وإياب الأبطال .. بينها إياب كلاسيكو الدوري لكن ما بيكون بذا الأهمية بالنظر للـ +16 ..
جيل مثل هالجيل نادرًا ما يجي، الجيل الي مسيطر على أوروبا للسنوات القليلة الماضية، والي بطبيعة الحال صعب نتقبل فكرة إنه يطلع من الـ 16 خصوصًا بعد خمس سنوات متواصلة بنصف النهائي .. فالتركيز بيكون منصبّ على دوري الأبطال أكثر من أي شيء آخر هالفترة!

وش المشكلة الآن؟ الفريق ظهر بشكل سيء جدًا بالذهاب وصعب يتكرر المستوى ذاك، فالمشكلة الوحيدة الآن هي النتيجة .. والي تذكرني كثير بأسوأ مباراة لعبها بارسا بيب "ذهاب نصف نهائي 2010". مشكلة النتيجة هذي إنها ضد فريق إيطالي وكالعادة بيكون فيه تقفيل للمناطق الخلفية بالكامل إيابًا.




الميلن له سقطات، أولاها بدت مع الديبور والقصة المعروفة، ثانيها مع الليفر وسقط بشوط واحد، والثالثة العام الماضي ضد الآرسنال والي قدر يسجل ثلاث أهداف بالشوط الأول بس، لكن ما انكتب له التأهل.
وش النقطة المراد إيصالها؟ الميلن له هيبة وما اختلفنا، لكنه نادي ما تضمنه إن تقدم بنتيجة كبيرة استنادًا على الثلاث أمثلة الماضية.

الميلن مب داخل المباراة مثل سابق مبارياته، بيدخل وهو مقفل مناطقه، وهنا المشكلة الي توقف بوجه البارسا بالعودة للمباراة وتكرار ما يحدث للميلن من مصائب بالإياب، وش الحل مع التكتل وكيف تقدر تكسرهـ وتنهيه؟



كلنا نتذكر أهداف نهائي ويمبلي، باستثناء هدف بيدرو أهداف ميسي وفيا جت من تسديدات من خارج المنطقة قدرت تفك دفاع المانيو، وبالذات هدف ميسي أقدر أحطه كمثال لأنه جاء من تسديدة قوية ..
هالحل ممتاز جدًا وقادر يخلّص لك مباريات، خصوصًا إن بالفريق أكثر من عنصر يقدر يشوت من بعيد: ميسي-بيدرو-فيا-سيسك-إنييستا-ألفيس-أدريانو......"

النقطة الثانية هي استغلال إنييستا كلاعب وسط لا جناح. لاعب مثل إنييستا عندهـ من الخصائص الي تخليك تفضّل إنه يلعب وسط على الجناح، لأنه بكل بساطة أفضل لاعب بالفريق يملك حلول للتقفيل:
قوة التسديد في هدفه ضد هوسبيتاليت (وشفنا كورة شبيهة لها بالذهاب)
رؤيته وتمريراته البينية في هدف إيتو ضد الآرسنال (1:20)
كرات طولية تكسر ظهور الدفاع، مثل هدف ألفيس على شاختار.
أسيست "لوب" لسيلڤا ضد پولندا.

جميعها حلول جبارة تقدر تفعلها بالإياب ضد الميلن، في حال وجود إنييستا بالعمق ..




ليش البارسا يحتاج ميسي 19 "الطرفي" أكثر من احتياجه لميسي 10 مكينة الأهداف؟

مثل ما تعودنا آخر السنوات، مركز ميسي الحالي يساعدهـ كثير على التسجيل وتحطيم الأرقام القياسية، لكنه مع الأسف بهالمركز إذا وجد تكتل دفاعي ما يكون على طبيعته، وتقل إمكانياته ومفعوله بالملعب عكس أي مباراة أخرى، وهذا بالذات غير مرغوب فيه بالإياب.

والحل؟ الحل برأيي هو إننا نشوف ميسي بمباراة ميلان بالجناح اليمين مثل بداياته، سرعة اختراقاته ومهاراته الجبارة بتفيد الفريق باقتحام المنطقة اليسرى للميلن، والنقطة الأهم طبعًا هي إننا نستفيد من وجود رأس حربا، نستفيد من وجود فيا برأس الحربا ..





تشافي: جيلنا هذا يفتقد لقلب النتيجة بشكل تاريخي!

منظومة برشلونة ما تشتهر بتصريحات مثيرة، لكن فيه تصاريح بالسنوات الأخيرة بمثل قوة تصريح تشافي، مثل:
بيكيه: "سنجعل لاعبي الإنتر ميلان يكرهون كرة القدم" - وطلع الفريق من الأبطال ..
بيب: "غدًا سنلعب عند 8:45 في الميدان، خارج الميدان مورينيو فائز دائمًا" - وفاز الفريق وتأهل للنهائي ..

هذي الي ببالي الآن، وكلها كانت مؤثرة جدًا بعضها كان إيجابًا والبعض سلبًا.

لكن تصريح تشافي كان مختلف تمامًا، لأن بالفعل الجيل هذا "من بدايات ريكارد" ما شهدنا منه عودة للمباراة "Comeback" بشكل تاريخي وبالأخص بمباراة كبيرة وحاسمة. بس ليش مباراة ميلن الأخيرة كانت غير عن أي مباراة خسر بها الفريق؟ وخلت تشافي يطلع ويلقي مثل هالتصريح؟ السبب بالإضافة إلى الهزيمة المستوى المخجل الي ظهر فيه الفريق ..

مع ضغط المباريات الحاصل هالشهر "كلاسيكو -أبطال"، هذا هو الوقت المناسب الي يظهر لنا الفريق بوجهه الآخر، الوجه الي فعلًا ناوي يصنع حدث تاريخي بقلب النتيجة بمباراة الإياب. حتى لو ما قدر الفريق يتأهل يكفينا إنه يخرج بشرف ويقدم مستوى مأمول.



#Remontada

ليست هناك تعليقات:

إرسال تعليق